U LEH NAU KIZOPNA
U LEH NAU KIZOPNAInnpipa (inn luahpa): Unau nih leh thum phate in zi leh ta a neih tek uh ciangin, a u pen lobuang abanbanin innthak bawlin inntuan uh hi. A u pen in innpi (apa’ inn) ngakin, “innluahpa” “innpipa” kici hi.
Tanu: Pasalte inn a tuan khit uh ciangin nopna dahna ah inn a nasem dingin amau laizom sanggamte leh, abeh sanggam numeite (akhaksate) nga telin, “Tanu” ci-in min vawh uh hi. A u pen thum teng” tanupi ci-in aneute gel” sabawl” kici hi.
Sih hun ciangin tanupi thum teng “Si-tuamte” kici hi. Si-tuampi-nu in misi numei ahih leh puandum, pasal ahih leh puan san tawh tuam hi.
Thalloh: Pasalte in inn atuan khit ciangin, nopna dahna ah thu a kikuppih a vaihawmpih dingin, beh pasal li teel, a” Thalloh” kici hi.
Pu: Pa’ pianna anu ii pate “pa’ pute” ahih kei leh “tangpute” kici hi. Ama’ pianna anu ii pate “pupate” kici hi. Samat leh sihna nopna a akigo sangawng peuhmah pupate kipuak hi.
Sungh: Zi ii pa leh a beh lamteng, “Sunghte” kici hi. Tate a dingin “Pute” kici hi. Sungh lamte ii ziteng Pite ci uh hi.
Nuphal: Zi ii sanggam numeite leh apasalte” Nuphal” kici hi.
Nung sang leh Masang: Zi ii nu leh pa te’ beh lam teng zi ii “Nungsang te, zi ii pasal beh lam teng amasangte” kici hi.
Ni leh Gang: Pa ii a sanggam numeite (beh numeite) “Nite” Nite pasalte Gangte kici hi. Pa ii sanggam numei a u pen “nipi” kici a pasal zong gangpi kici pah hi.
Papi leh Nupi: Pa ii sanggam pasal upen “papi” a zi pen “nupi” kici hi.
Thusa: Nop sung, dah sungah thuvan thu kan ding akiseh veng pasal tangzang te “Veng thusa” beh pasal tangzangte” beh thusa” kici hi.
Nungak: Pute lam numeite “Nungak” kici hi.
Tute: Tanute ii tate, nite ii tate khempeuh “Tute” kici hi.
Maak te: Tanute leh nite ii pasal te, “Maakte” kici hi.